ATTENTION

Please note that this site is now an archive site and is no longer being updated. Updates ceased in May 2003.

For current information please go to

www.paclii.org

LONG SAED BLONG SKUL BLONG LOA

Program blong loa long USP hem i defren long ol program blong loa long evri nara yunivesiti, from we stamba blong program blong USP hem i abaot ol kaontri blong Saot Pasifik. Klosap evri studen long program ia oli kam long ol Pasifik kaontri nomo. Be hem i minim se i gat ol studen we oli kam long ol defdefren kaontri. Hemia i mekem wok blong ol tija i had lelebet, be semtaem tu Skul blong Loa i awea fulwan long hem, mo i hop se samting ia bae i mekem skul ia i kam moa strong.

Wok blong Skul blong Loa hem i blong tijim loa long ol studen mo karemaot ol studi long saed blong loa. USP i gat 12 defren kaontri we i stap insaed long hem, minim i gat 12 (o bitim 12) defren sistem blong loa we oli mas tijim. So ol tija oli skelem ol defren sistem, mo ol stadi we oli stap mekem tu hem i semak.

Skul blong Loa i bin stat long 1994 nomo, mo kasem naoia men wok blong hem i blong tijim ol studen we oli stap long wan kampus blong USP. Ol studen ia oli save mekem fas yia blong digri blong olgeta long Laucala Kampus (long Suva, Fiji) o long Emalus Kampus (long Port Vila), mo Yia 2, 3 mo 4 blong olgeta long Emalus Kampus nomo. Be stat long naoia, Skul blong Loa i stap tijim plante kos blong digri blong loa tru long Ekstensen, mekem se i mo isi blong ol studen olbaot long ol aelan long Pasifik blong tekem sam kos blong digri ia.

Ol staf blong Skul blong Loa oli kwalifae mo oli gat ekperiens raonwol. Oli stap traehad blong mekem ol kos we oli tijim mo ol stadi we oli mekem i stap long semak level olsem ol nara yunivesiti long ol defren kaontri long wol. Oli traehad tu blong mekem evri samting insaed long ol kos ia i klia long ol studen.

 

Evri yia tu, sam bigman we oli tijim loa long sam nara yunivesiti oli kam visitim Skul blong Loa blong givhan long saed blong tijim sam kos o blong mekem sam stadi long saed blong loa long Pasifik.Staf blong Skul blong Loa tu oli givhan long ol kot mo ol gavman blong Pasifik. Skul blong Loa i stap helpem wan nara dipatmen blong USP (Institute of Justice and Applied Legal Studies) blong trening blong ol majistret mo sam nara kaen wok olsem.

Stadi blong loa i save helpem ol studen blong faenem gudfala wok, i no olsem wan loea long kot nomo, be insaed long bisnis, indastri, manejmen mo pablik sevis. Hem i minim se wok we Skul blong Loa i mekem, i no blong trenem ol loea nomo, be blong trenem ol man mo ol woman blong ol defren kaen wok. Skul blong Loa bae i stanap strong blong helpem ol kaontri mo ol komiuniti long Saot Pasifik tru long tijing, stadi mo sevis long komiuniti we hem i stap mekem.

* For information regarding the Pacific Languages Unit at USP Port Vila Campus click here.

[About the School of Law] | [Courses Offered] | [Course Materials] | [Staff]
[Pacific Law Materials] | [Journal of South Pacific Law]
[Emalus Campus Library] | [Recommended Internet Links]
[Latest Additions]  | [Search the Site]

© University of the South Pacific 1998-2002

If you have any comments, suggestions or difficulties with using this web site please email
Robynne Blake, Internet Project Manager, The School of Law, The University of the South Pacific or fax: (678) 27785

Last Update: Monday, June 02, 2003 08:20